KALIBO, Aklan—Sambilog sa mga rason it pagkamatay it maabong pumueoyo hay ro polusyon sa hangin.
Bangud kara, kada dag-on nagapartisipar ro Pilipinas sa selebrasyon it World Environmental Health Day agud ipaintindi sa puliko ro epekto it air pollution sa ikaayong eawas ag palibot.
Suno kay Engr. Lucio Sta. Maria, sanitary engineer it Provincial Health Office ukon PHO-Aklan nga tuyo man it nasambitan nga aktibidad nga makahimo it tikang para makaangkon it malimpyo nga hangin para sa tanan.
Madumduman nga ko dag-on 2018, nakalista ro World Health Organization (WHO) it 120,000 katawong nagakamatay sa Pilipinas bangud sa mahingko nga hangin rason agud maangkon ro ikatlong pwesto sa bilog nga kalibutan bangud sa nasambitang polusyon.
Kaeakip sa mga sakit nga mabo-oe sa mahingko nga hangin hay ro lung cancer, stroke, pulmonary disease ag acute respiratory infections kapareho it pneumonia.
Samtang agud masolusyunan ro rayang problema hay ginapatuman man it DENR ro Republic Act 8749 ukon kilaea man sa tawag nga Philippine Clean Air Act of 1999, sangka polisiya ag programa nga nagatuyong mapabilin ro malimpyo nga hangin para sa mga Filipino ag mabawasan ro ro epekto it air pollution sa ekonomiya it nasyon.
