KALIBO, Aklan—Makita sa kahawaan it Taiwan ro pabalik-balik nga pag-eupad it andang mga aircraft bilang baeos sa pagpamaeag it China nga pagpakita it andang pwersa.
Suno kay Bombo International Correspondent Reynand Dumala-on it Taiwan nga mabatyagan makaron ro tensyon sa tunga it daywang nasambit nga nasyon.
Kadungan suno kana sa pag-anunsyo it China nga magapatigayon sanda it military exercise partikular ro “live fire drill” sa kaeawran sa palibot it Taiwan, ginpahaum man it Taipei ro andang arsenals ag ginbutang sa heightened alert ro andang military.
Ginapanindugan it Taiwan nga ro tikang it China hay sangka klaru nga pag-eabag sa international law on the sea bangud sa pagsueod sa teritoryo it andang nasyon.
Ro tensyon hay kasunod it pag-abot ni US House of Representatives Speaker Nancy Pelosi sa Taiwan ko Martes it gabi-i nga ro katuyuan hay agud nga ipahayag ro “American solidarity” sa Chinese-claimed island.
Raya ro pinakaunang pagbisita sa sueod it 25 anyos ag nagapameligro nga makaapekto sa relasyon it Washington ag Beijing.
Suno kay Dumala-on nga pila sa naging aktibidad ni Pelosi hay ro pakikipagkita kay Taiwan president Tsai Ing-wen ag sa legislating body.
Ginapatihan nga sambilog sa andang natalakay hay ro ginaduso nga independencia it Taiwan halin sa China.
Ginpasiguro man sigon it Amerika ro suporta sa Taiwan.
Maabu suno kana nga mga Taiwanese ro owa naalarma sa paeag it China bangud sa kahauman it andang military ag andang emosyon.
Apang engkaso nga makaangkon it giyera, magakinahangean sigon ro Taiwan it suporta halin s a western countries.
