KALIBO, Aklan—Mabahoe ro tsansa nga makahampang ro Akeanon basketball player nga si Zedjay Etulle it Barangay Tugas, Makato sa Under 23 3×3 sa FIBA world Cup nga pagahiwaton sa China sa maabot nga Hunyo 10 hasta 16, 2024.
Raya hay matapos nga imbitahan imaw nga maging kaparte it an-um nga players nga magasabak sa nasambit nga event kasunod it anang pagmadinaeag-on sa try-out.
Ro daywa suno kana sa andang pool hay magiging reserved player.
Gindugang pa nga sigidas ro praktis makaron it andang team hasta nga makabiyahe sa China.
Matapos nga maging kaparte it Gilas 3×3 pool, maga-adjust sigon imaw it husto bangud nga sanay imaw sa pagiging 5-on-5 player.
Mabahoe suno kana nga exposure ag opportunity nga maging kaparte it Gilas pool ag iga-represent ro Pilipinas sa FIBA world cup.
Samtang, ginpahayag it 6”5’ player nga si Etulle nga nakataeana man imaw nga magahampang sa maabot nga season 100 it National Collegiate Athletics Association ukon NCAA sa idaeum it San Beda Red Lions bilang forward player.
Dati imaw nga nag-eskwela sa Aklan Polytechnic College kun sa siin gin-recruit it NU bulldogs, ro basketball team it national university ko senior high , apang owa nakahampang bangud sa COVID-19 pandemic.
Ginpasiguro man nana nga mas pa nga pamayaron ro paghampang it basketball agud nga maabot ro handum nga makasueod sa Philippine Basketball Association ukon PBA.
