Ginpaathag it Aklan Electric Cooperative (AKELCO) ro mga rason it pagtaas it sueuktan sa kuryente makaron nga buean it Hulyo.
Sa andang ginpatigayon nga press conference kahapon nga adlaw it Byernes, Hulyo 24, ginpahayag ni AKELCO General Manger Atty. Ariel Gepty nga tumaas ro suektan sa kuryente halin P12.11 kada kilowatt-hour ku buean it Hunyo hasta sa P13.34 per kWh nga staggered rate para sa buean it Hulyo bangud sa nagkaeain-eain nga operational ag economic nga factors.
Suno kay Atty. Gepty, daywa ro nagapangunang ginabue-an it suplay it andang ahensya, ro Power Supply Agreements (PSAs) ag ro Wholesale Electricity Spot Market (WESM).
Ro PSAs hay mga pangmabuhayan nga kontrata sa mga power generation company, samtang ro WESM ro ginabue-an it dugang nga suplay para masolusyunan ro pabag’o-bag’ong demand sa kuryente.
Dugang pa nana, nakakabulig ro nasambit nga sistema para masigurado ro bastante nga suplay it kuryente nga bukon it sobra ro gina-kontratang kapasidad, nga makalikaw man sa dugang nga gastos nga pwede mapas sa mga consumer.
Kaibahan sa mga nagapangunang rason it pagtaas it presyo sa WESM ro mataas nga demand tuga it El Niño, kakueangan it suplay tuga it mga plant outages, ag pabag’o-bag’ong presyo it langis sa pangkalibutanong merkado.
Pahayag dugang ni Gepty nga sa pihak nga mas mapag-on ro presyo sa idaeom it PSAs, naaapektuhan gihapon raya it pagtaas it pangkalibutanong presyo it langis, inflation, ag pagbag-o sa foreign exchange rates.
Ginklaro man nana nga sa pihak it pagtaas it panueuktan, nagapabilin nga AKELCO ro may pinakamanaba nga residential rate sa bilog nga Panay Island.
