KALIBO, Aklan—Ginpaathag it pamunuan it Aklan Electric Cooperative ukon Akelco ro naging rason kon ham-an nga nagbuhay ro naexperiensiyahan nga power interruption kahapon it agahon.
Suno kay Engr. Roderick Ortega, OIC it Engineering Department it Akelco nga matapos ro unscheduled power interruption it National Grid Corporation of the Philppines ukon NGCP nga nag umpisa alas-7:05 it agahon hasta alas-7:45 hay uman nga naduea ro supply it kuryente bandang alas-8:46 it agahon hasta alas-11:46.
Ginpahayag ni Engr. Ortega nga matapos ro load transfer it NGCP halin sa Mambusao sub-station it Capelco paagto sa Nabas-sub-station hay naka-angkon it fault ro 69-KV transmission line ag sa ginpatigayon nga line patrol, natukiban nga ro diperensiya hay sa linya it Solido, Nabas.
Nagbuhay suno kana it haeos tatlong oras ro ginpatigayon nga repair it mga tawuhan it maintenance crew it NGCP. Ro apektadong coverage area nanda hay ro sakop it Nabas-substation, Lezo sub-station, Andagao ag Altavas sub-station.
Samtang, ginpaathag dugang nga ro natabu man nga power interruption sa banwa it New Washington kahapon umpisa alas-8 it agahon hasta alas-5 it hapon hay naka-schedule para sa pag-ayos it feeder 3 nga nagasakop sa Pook, hasta sa Dumaguit ag mga kabaryuhan it banwa it New Washington.
Apang bangud sa owa nakaschedule nga power interruption it NGCP hay naging 6:00am hasta 6pm ro black out sa lugar.
