KALIBO, Aklan—Ginpasiguro it Aklan Electric Cooperative ukon Akelco nga owa it matabu nga power interruption umpisa sa Lunes, Oktubre 30 hasta sa Nobyembre 6, 2023.
Suno kay Engr. Jude Ropa, head it engineering department it Akelco nga ro nasambit nga mandu hay naghalin sa Department of Energy ag National Electrification Administration ukon NEA bilang preparasyon sa nagahilapit nga Barangay ag Sangguniang Kabataan Elections sa Oktubre 30 ag sa observance it All Saints ag All Souls Day sa Nobyembre 1 ag 2.
Sakop sigon it mandu ro National Grid Corporation of the Philippines ukon NGCP.
Iga activate suno kana umpisa sa Lunes ro naka deploy nanda nga mga maintenance crew sa 17 nga banwa sa Aklan ag ap-at nga team nga magatutok ag maga trouble shoot engkaso nga makaangkon it mabahoe nga problema sa linya nga maging rason sa pag angkon it power interruption.
Ro nasambit nga mga team hay magahalin sa Altavas, Andagao, Lezo ag Nabas.
Gindugang pa ni Engr. Ropa nga ko nagtaliwan nga mga inadlaw hay nagpatigayon man sanda it pag inspection sa mga electric facilities sa mga polling ag canvassing centers sa Aklan.