KALIBO, Aklan—Ginpromisa it Aklan Electric Cooperative ukon Akelco nga antes ro adlaw mismo it paskwa hay maibalik eon ro supply it kuryente sa mga lugar sa Aklan nga naapektuhan it mga nagkaeatumba nga poste ko nagtaliwan nga mga inadlaw antes pa man ro pagpanaeasa it bagyong Odette.
Nasayuran bago ro pagtama it bagyo hay nakaexperiensiya eon it mabaskog ag sunod-sunod nga pag-uean ro aklan nga nagtuga it mga pagbaha.
Bangud kara, pilang poste ro nadaeahig sa pagkatiphag it mga eugta sa kilid it aklan river ag mabaskog nga hangin.
Kaabuan kara hay sa banwa it Libacao partikular sa barangay it Pampango ag Alfonso Dose.
Suno kay Engr. Jude Ropa, head it Engineering Department it Akelco nga haeos 31 nga poste sigon ro andang iga-relocate sa karsada nga nag-umpisa ko sabado nga adlaw.
Nag deploy man sanda it mga tawuhan halin sa Lezo, Altavas ag Malinao agud nga mapadasig ro trabaho.
Suno pa kay Engr. Ropa nga bago pa ro bagyong Odette hay naduea-an eon it supply it kuryente sa nasambit nga mga lugar.
Samtang, agud nga mapadasig ro rehabilitasyon sa mga naapektuhan it bagyo sa antique ag guimaras nagpadaea sanda it mga tawuhan idtu ag boom truck.
Pagkatapos sigon it restoration works sa nasambit nga mga probinsiya hay posibleng mapadaea man sanda it tawuhan sa Negros.
Ro nasambit nga mga electric cooperatives suno kana hay nagbulig man kanda sa pagpanaeasa kato it bagyong Yolanda sa Aklan rason nga nagabalik man sanda it bulig makaron.
