Ginaproponer makaron it Aklan Electric Cooperative ukon Akelco ro pag-imponer it 10 percent surcharges sa mga member consumer sa oras nga inde makabayad ro mga raya sa gintaeana nga due date of payment.
Suno kay Atty. Ariel Gepty, acting general manager it Akelco nga ro nasambit nga proposisyon hay nag-ugat matapos mataeopangdan ko mga nataliwan nga binuean nga kapin sa dos porsyento eamang it mga konsumidor ro nagabayad it andang electric bill sa eksaktong petsa it andang due date.
Ginpaathag dugang nga kapin sa 98 porsyento gid ro ulihi nga nagabayad it andang nakonsumo nga elektrisidad rason nga ulihi man ro andang pagbayad sa mismong source it power supply kon siin sanda ro nagapas-an sa penalidad nga gina-imponer it korporasyon.
Suno pa kay Atty. Gepty, raya ro nakita nga pamaagi it Akelco agud nga mapursige ro mga konsumidor nga magbayad sa eksaktong oras it andang obligasyon.
Apang, ginklaro kara nga raya hay proposisyon pa eamang ag nakataeana nga igapresentar sa mga member consumer sa igapatigayon nga annual assembly sa adlaw it Sabado, Hulyo 30 sa ABL sports complex sa Capitol.
Samtang, kon inde magsugot ro mga konsumidor hay pwede ro mga raya nga magsumite it andang proposisyon sa taeatapan it Akelco para sa andang nahamut-an nga gustong ipasa para maging disiplinado sa andang obligasyon.
