KALIBO, Aklan—Ginaeauman nga pagatalakayon sa nakataeanang dag-unan nga Annual General Membership Assembly ukon AGMA it Aklan Electric Cooperative ukon Akelco ro may kaangtanan sa daywang importanteng naka-pending nga isyu.
Suno kay Atty. Ariel Gepty, General Manager it Akelco nga sambilog kara ro nakabinbin nga apela it mga miyembro konsumidor nga panabaan ro penalty sa 2% halin sa 10% sa mga delingkwente ag delayed nga magbayad it andang electric bill.
Ko nagtaliwan sigon nga AGMA ko Hulyo 2022, ginproponer it Philippine Chamber of Commerce and Industry ukon PCCI-Aklan ro pagnaba sa penalty, apang owa raya natigayon nga maresolba.
Ginpaathag dugang ni Atty. Gepty nga nagdesisyon ro Akelco ko nagtaliwan nga dag-on nga magapatuman it 10% nga multa sa mga delinquent member consumers matapos mataeupangdan nga haeos katunga it kabilugan nga member consumers hay owa nagabayad sa tamang oras nga eubus nga naka apekto sa andang operasyon.
Gindesisyunan man sigon it Akelco nga suspindihon ro apela nga magpatong it penalty ko nagtaliwan nga AGMA bangud sa hugut nga pagpamalibad kara it mga miyembro konsumidor.
May ginaduso man sigon si board member Jay Tejada nga makaangkon it moratorium sa 10% surcharge hasta sa dag-on 2025.
Kabay suno kana nga maresolba eon ro nasambit nga isyu sa nagahilapit nga AGMA sa Mayo 27 sa ABL Sports and Cultural Complex kadungan sa 51st anniversary it Akelco ko Abril 25.
Ro nasambit nga mga isyu suno kana hay pagabotohan sa pagahiwaton nga AGMA.
Samtang, ginpahayag pa ni Atty. Gepty nga ginaproseso man makaron it Akelco ro andang renewal it prangkisa nga ginaduso makaron sa manaba nga kapueungan it kongreso.
Sambilog pa sa isyu nga pagatalakayon hay ro pag apela sa mga member consumers nga pataasan ro membership fee sa P50 pesos.
Ro presenteng panueuktan hay limang peso eamang ag owa ginpataasan it Akelco sa humalin sa pag umpisa it andang operasyon may 50 anyos eon ro nagtaliwan.
