KALIBO, Aklan–Nagadoble-kayod eon ro mga tawuhan it Aklan Electric Cooperative (Akelco) agud eubusan nga maayos ag maibalik ro suplay it kuryente matapos ro sunod-sunod nga na-eksperyensyahang power interruption ko mga nagtaliwan nga adlaw.
Ginpahayag ni Engr. Jude Ropa it Akelco nga nagdugang eon sanda it maintenance team agud mas mapadasig ro trabaho.
Kaeabanan sigon nga fault hay halin sa linya it National Grid Corporation of the Philippines (NGCP) ag sa ibang lateral lines it Akelco eabi eon sa service drop it residential houses nga tuga it mga natumba nga puno it kahoy ag butong bangud sa mabaskog nga hangin.
Ginpasiguro man kara nga ginahimo nanda ro tanan agud mapadasig ro eubusan nga pagbalik sa normal it suplay it kuryente sa bilog nga probinsya.
