Ginpaathag it Aklan Electric Cooperative ukon Akelco nga bukon it tanan nga sunod-sunod nga brownout nga naeksperyensyahan sa pilang barangay sa banwa it Kalibo hay bangud sa andang linya.
Suno kay Engr. Jude Ropa it Akelco, ro ibang power interruption hay ana it National Grid Corporation of the Philippines ukon NGCP.
Base sa pagpangusisa, ro pilang rason it unscheduled brownout hay bangud sa sawa ag ro iba hay bangud sa ginapatigayon nga maintenance partikular sa Brgy. New Buswang, Kalibo.
May kaangtanan kara, may nakataeana nga power interruption sa adlaw it Sabado, Hunyo 18 maghalin it alas-5:00 it agahon hasta it alas-6:00 it hapon kon sa siin apektado kara ro sub-station it Nabas, Lezo, Altavas ag Andagao bangud nga may maintenance it linya ro NGCP ag Akelco.
Kamana man sa adlaw it Dominggo, Hunyo 19, maghalin it 4:00pm-6:00pm hay may maintenance man nga igapatigayon ro Akelco sa andang linya.
Bangud kara, ginsuhestyon ni Ropa nga inde anay pagsudlan ro andang mga refrigerator agud nga inde masamad ro andang mga igapanindahan sa nasambitang mga adlaw.
