Gin-aku it pamunuan it Aklan Electric Cooperative, Inc ukon Akelco sa ginpatigayon nga 40th annual general membership assembly ukon AGMA 2023 nga daywang beses sanda nga gin-imbitahan sa senate hearing kasunod it imbestigasyon sa sunod-sunod nga power interuption sa bilog nga probinsya it Aklan ag bilog nga Western Visayas ko nagtaliwan nga buean.
Suno kay Atty. Ariel Gepty, General Manager it Akelco nga sa pagpanguna sigon it chairman sa committee on energy nga si Senator Raffy Tulfo hay gintalakay ro may kaangtanan sa mga solusyon nga pagahimuon sa kakueangan sa serbisyo it National Grid Corporation of the Philippines ukon NGCP.
Nagasuporta sigon sanda sa ginaproponer nga pagseparar sa transmission authority it NGCP maghalin sa systems operation.
Raya hay para sigon nga malikawan ro uman nga na-eksperyensyahan it mga konsumidor nga sunod-sunod nga power interruptions.
Malisod sigon kun sambilog eamang nga entity ro nagabuyot sa kaparehong pagtransmit ag operate it sistema it transmissions it enerhiya.
Nagakabaeaka sigon suno kana ro mga senador sa posibleng pagsabotahe sa mga konsumidor bangud puwedi eon nga makontrol ro mga operasyon it linya it mga kuryente pamaagi sa sangka software nga ginatawag nga supervisory control and data acquisition.
Ginpaathag dugang nga ro Akelco sigon hay kabahin sa ginatawag nga distribution maghalin sa tatlong ka power sector.
Kun siin nagahueat eon lang raya it delivery it enerhiya maghalin sa transmission it NGCP nga naga halin sa nagkaeain-eain nga generators.
Samtang, ro NGCP man ro nagakontak sa mga generators engkaso nga may una nga line disturbance para magsynchronize ro pagpasueod it mga enerhiya sa grid bangud sa kinahangean nga tanan nga linya hay mabuksan para mabalanse ro load it kuryente.
Sa makaron owa pa it pinal nga deliberasyon ro committee on energy angot sa nasambit nga mga isyu bangud sa nasuspinde ro nasambit nga pagpamati ag nakataeana paeang nga igapadayon.
