KALIBO, Aklan—Ginbawi ni Aklan 1st District Congressman Carlito Marquez ro anang suporta sa kontrobersiyal nga House Bill 9826 nga may titulong “An Act Creating Boracay Island Development Authority, Defining its Powers and Functions, and Providing Funds Therefore” ukon BIDA Bill.
Ro House Bill No. 9826 hay halin sa gintingob nga kapin sa 9 nga kaparehong bills nga nagatuyo nga magtukod it Bida bilang government-owned and -controlled corporation ukon GOCC nga may corporate powers nga magabilog it Boracay Action Plan.
Ginrason ni Congressman Marquez nga maabu nga mga stakeholders sa aklan ro nagapamaeabag sa nasambit nga hagna rason it anang pag-atras.
Pormal eon sigon nga nagpadaea imaw it sueat kay Majority Leader ag Chairman it Committee on Rules Ferdinand Martin Romualdez sa pag withdraw it anang suporta.
Madumduman nga pasado eon sa ikaywang pagbasa it Kamara ro proposisyon agud nga magbilog it GOCC nga magadumaea sa Boracay.
Raya hay sa pihak it hugut nga pagpamalibad it mga lokal nga opisyal , mga ahensiya it gobyerno ag nagkaeain-eain nga grupo sa isla.
Engkaso nga maduso hay ginakabaeak-an nga maka-apekto raya sa mga maintok nga negosyante ag residente it isla.
Kamana man nga maduea-an it kinamatarung ag mandato ro lokal nga gobyerno it aklan ag banwa it Malay.
