Kalibo Aklan——Kaibahan si Aklan 1st District Congressman Carlito Marquez sa mga nagboto it yes agud nga maipasa ro House Bill 6616 ukon ro Bayanihan Act of 2020 nga nagatuyo nga maka-deklara si Pangueong Rodrigo Duterte it State of National Emergency bangud sa Coronavirus Disease o COVID-19.
Sa interview it Bombo Radyo Kalibo , ginpahayag kara nga sambilog imaw sa 284 nga kongresista nga nagboto it yes, kun sa siin 9 ro No ag 0 ro nag-abstain .
Nagpasakop sigon imaw sa botohan pinaagi sa instant messaging .
Kapin sa 20 eamang ro physically present sa plenaryo it Kamara samtang ro iba hay nagpasakop sa debate ag botohan pinaagi sa video conference ag text message .
Suno kay Cong. Marquez nga pinaagi sa igatau nga emergency powers , ginapasugtan ro pangueo nga i-realine ro nabilin nga pondo sa 2019 budget kamana man ro paggamit it pondo sa idaeum it 2020 General Appropriations Act.
Tuyo kara nga makabakae ro gobyerno it mga kinahangeanon nga gamit agud nga suk-ean ro COVID-19 kapareho it mga medical supplies and equipment ag mga pagkaon nga igapanupod sa mga apektadong komunidad nga indi eon maga-agi sa procurement process.
Naipasa suno kana ro proposisyon bandang alas-12 it tungang gabi-i ukon haeos 14 oras nga special session it Kamara.
Sa pihak nga parte, ginpasiguro ni Cong. Marquez nga paga-ayudahan ro mga apektadong residente ag trabahador sa aklan pinaagi sa pondo nga igapa-agi nana sa department of social welfare and development ukon DSWD.
