Aklan 1st District Rep. Marquez, ginpakamayad nga magtukod it BIDA sa tuyo nga maprotektahan ro Boracay
KALIBO, Aklan— Sa tuyo nga maprotektahan ro Boracay ag mapabilin ro naumpisahan nga pag-rehabilitate sa isla sa sueod it an-um nga buean, ginpakamayad ni Aklan 1st District Rep. Carlito Marquez nga magtukod it Boracay Island Development Authority ukon BIDA.
Suno kay Marquez nga pinaagi sa anang gindihon nga House Bill No. 7256, ginpasiguro nana nga makaangkon it mabahoe nga papel ro lokal nga gobyerno angot sa mga local matters.
Gindugang pa kara nga ro paghimo it mga plano ag programa para sa pag-umwad it boracay ag caticlan nga imaw ro entry point hay nagakinahangean it bulig it national government.
Madumduman nga gin-extend ni Pangueong Rodrigo Duterte it sang dag-on ukon hasta sa mayo 2021 ro serbisyo it ginbilog nga Boracay Inter-Agency Task Force nga imaw ro nagadumaea makaron sa isla.
Bangud kara, importante sigon nga makaangkon it BIDA nga imaw ro magasigurado nga magapadayun ro rehabilitation ag ecological sustainability it Boracay ag bilog nga banwa it malay nga pagakabigon nga special development and tourism zone, kun sa siin may direktang superbisyon ni pangueong Duterte.
Sa idaeum it HB 7256, may nakataeana kara nga initial fund nga kapin sa 2-billion pesos para sa operasyon it BIDA.
Apang ro dag-unan nga gastos hay sa idaeum it General Appropriations Act.
Padayun man sigon nga makabaton it Internal Revenue Allotment (IRA) ro tatlong barangay it Boracay ag caticlan nga gintaeana kanda.
Sa version ni Marquez, ro governing board ag policy-making body it BIDA hay ro Boracay Island Development Council nga pagaeakipan it gobernador it Aklan, mayor it banwa it malay, barangay chairman it tatlong barangay it boracay ag Caticlan kamana man ro presidente it Boracay Foundation Incorporated (BFI), presidente it Philippine Chamber of Commerce and Industry-Boracay ukon PCCI Boracay ag daywang representante halin sa NGO ag may kaangtanan sa boracay.
Ro magiging chairman it Council hay iga appoint it Presidente.
Nasayuran nga mag-eowas kay marquez may kaugalingon man nga version it proposed bill sa pagtukod it BIDA si presidential son ag Davao city 1st district Congressman Paulo Duterte ag Congresswoman Claudine Diana Bautista.
