KALIBO, Aklan—Handom makaron ni Aklan 1st district Sangguniang Panlalawigan elected Mark Vega Quimpo nga mabuytan ro komitiba sa edukasyon bangud nga raya sigon ro anang mas gintutukan sa anang tatlong termino sa pagka sangguniang bayan it Kalibo.
Tuyo kara nga mapasanyog ro naga-eksister eon nga scholarship program it provincial government bangud nga nagapati imaw nga edukasyon ro armas it mga pamatan-on para mapaumwad ro andang kaugalingon, pamilya ag komunidad.
Gusto nana nga madugangan ro pondo para maexpand pa gid ro programa nga makaabot man sa mga nagakinahang-ean nga mga Aklanon nga naga-eskwela sa ibang lugar.
Sa pihak nga parte, nagpaabot man it pagpasaeamat si Quimpo sa tanan nga nagsuporta sa andang grupo partikular kana nga gintaw-an imaw it uman it tyansa nga makapanerbisyo sa mga pumueoyo bukon eamang it sa banwa it Kalibo kundi sa bilog eon nga probinsya it Aklan.
Sambilog nga anang ginatan-aw nga factor sa anang pagdaog hay ro pagiging top performer nga konsehal it banwa bangud sa maabong mga resolution ag ordinansa nga anang naipasa.
