KALIBO, Aklan—Ginpaboran ni Aklan re-elected 1st district board member Nemesio Neron ro plano ni presumptive vice president Sara Duterte nga gintaeana bilang opisyal it Department of Education ukon DepEd ni presumptive president Ferdinand “Bongbong” Marcos Jr. nga ibalik ro mandatory Reserve Officers’ Training Corps ukon ROTC sa mga eskwelahan.
Ginpahayag ni Neron nga suportado imaw sa gusto nga himuon it incoming vice president bangud nga mabahoe raya nga bulig sa komunidad engkaso nga may mga worst scenario nga matabo sa nasyon kaparehas makaron sa nagakatabong gyera sa tunga it Ukraine ag Russia.
Ginpaathag dugang nga kinahang-ean gidman nga ipreparar ro mga able citizen para maprotektahan ro lugar kontra sa mga insurgency.
Mag-eowas nga makadepensa sa nasyon hay madevelop pa ro leadership, self discipline ag self confidence sa mga pamatan-on.
Sambilog man sigon raya nga pamaagi para matapna ro pagsueod it mga ginasugid nga makawaeang grupo partikular sa mga unibersidad nga naga-engganyo sa mga estudyante nga magpasakop sa andang hubon.
