KALIBO, Aklan—Naging mainit ro mga ginbuhian nga alegasyon it dating presidente it Island Charter Transport and Services Inc. nga si Jeunesse Menoto kontra kay Aklan 2nd District Congressional aspirant Retired Lieutenant Matias “Matt” Wacan.
Sa interbyu it Bombo Radyo Kalibo, nagapangayo ag nagapaninggiton it hustisya si Menoto matapos nga mabiktima sigon it pagpangloko nanday Retired Lieutenant Wacan ag kaibahan karang si Noey Rufin nga sa makarun hay presenteng idto sa nasyon nga Australia.
Dag-on 2006 kat nagdesisyon sigon imaw nga mag-eukat it prangkisa para sa public utility transport sa Isla it boracay kaibahan sanday Rufin ag Wacan kun sa siin nagbayad pa imaw it mabahoe nga balor it kwarta para sa mas madasig sigon nga proseso.
Sa sueod it sang dag-on nga pagbinalik-balik sa opisina it LTFRB region hay owa sa gihapon nairelease ro anang ginahueat-hueat nga prangkisa.
Ko ulihi hay may nakit-an sigon nga prangkisa idto sa regional office apang raya hay nakapangaean kay Noey Rufin.
Bangud kara, ginkuwestiyon ni Menoto ro naging proseso ag kung paalin raya nga nakabo-oe it prangkisa samtang imaw ro nagbaka-baka sa pagproseso.
Dugang pa kara nga ginbaligya eun sigon it kapin sa 2.9 million pesos ro nasambitan nga prangkisa sa ibang kooperatiba.
Sa makarun hay gusto na sigon nga maangkon ro hustisya kamana man nga maipakilaea sa mga pomoeuyong Aklanon kung ano ro matood nga pagkatawo ni Matt Wacan.
