KALIBO, Aklan— Namatay eon ro magakandidato kunta sa pagka-kongresista sa 2nd district ko probinsya it Aklan nga si Atty. Leovigildo Mationg matapos nga uwa kara nasarangan ro anang operasyon sa sakit nga prostate cancer sa St. Pauls Hospital sa Iloilo City.
Si Mationg hay naging National Electrification Administration (NEA) Corporate Lawyer antes nga ginbutang bilang Project Supervisor it Aklan Electric Cooperative (AKELCO); naging myembro it Board of Directors (BOD) kon siin nagserbe sa sueod it 12-anyos ag ko ulihi hay naging General Manager hasta ko 2001.
Unang ginsueod kara ro pulitika ko May 2001 election kon siin imaw nagkandidato bilang congressman sa lone district of Aklan apang napyerde kontra kay dating Vice Gov. Billie Calizo–Quimpo.
Uman imaw nga nagpailihir sa pagka-gobernador ko May 2010 election apang uwa gihapon pagswerteha kontra sa presenteng kongresista it Aklan nga si Atty. Carlito Marquez.
Makaron nga May 2019 mid-term election hay nakalinyada kunta si Mationg sa mga magakandidatong kongresista kontra kay dating Aklan Congressman Ted Haresco ag Victoria Ramos-Antonino nga onga it ginbansagang “Father of Aklan” nga si dating Aklan Governor Godofredo Ramos.
