KALIBO, Aklan—Ginpaathag ni Aklan 2nd District Congressman Teodorico Haresco nga owa imaw it pagasuportahan nga bise gobernador ag provincial board members sa masunod nga eleksyon.
Raya hay kasunod it owa nanda pagka-ilintindihan ni Aklan Vice Governor Reynaldo Quimpo matapos ro pagdihon it resolution nga nagakontra sa House bill 1085 ukon pag-refile it Boracay Island Development Authority (BIDA) bill sa idaeom it Government-Owned and Controlled Corporation (GOCC) sa kongreso it pilang kongresista.
Gin-insister ni Congressman Haresco nga owa sanda kasayod ni Aklan 1st District Congressman Carlito Marquez nga naghimo it resolution ro Sangguniang Panlalawigan nga naga-kontra sa nasambit nga hagna kamana man ro resolution nga nagadeklarang “persona non-grata” sa ap-at ka mga representante it Camarines Sur.
Ro ginhimo sigon it mga lokal nga opisyal hay klaro nga kawad-an it pagrespito kanda ni Congressman Marquez.
