Medyu nagpahayag it kaeain it buot si aklan 2nd district congressman Ted Haresco sa 19th Sangguniang Panlalawigan matapos nga nagdihon it resolution nga nagadeklara sa ap-at nga mga kaibahan nga kongresista bilang “persona non grata” sa Boracay at bilog nga probinsiya it Aklan.
Nag-ugat ro isyu sa uman nga pagbuhi sa proposisyon nga Boracay Island Development Authority – Government Owned and Controlled Corporation (BIDA-GOCC).
Bilang representante sigon it ikaywang distrito it probinsiya sa manaba nga kapueungan it kongreso hay dapat nga gin-abisuhan man imaw it andang tikang.
Ro ginapangayo eamang sigon nana hay ro respeto ag kortesiya halin sa anang mga kaparehong opisyal nga aklanon.
Nasayuran nga ro nasambit nga resolusyon nga gindihon ni Vice Governor Reynaldo Quimpo hay insigidang ginbawi sang adlaw pagkatapos nga maaprubahan.
Tuyo it gindihon nga House Bill 1085 ukon Proposing the Creation of Boracay Island Development Authority (BIDA) as a Government-Owned and Controlled Corporation (GOCC) ko Hulyo 4, 2022 nga itugyan sa national government ro pagpadaeagan sa operasyon it Boracay.
Makabig sigon raya nga eabag sa konstitusyon ag kawad-an it respeto sa mga aklanons.
Insigidang nagpatigayon it special session ro provincial board members hapon it Martes agud nga bawion ro nasambit nga deklarasyon kontra kanday Luis Raymund “Lray” Villafuerte it 2nd District it Camarines Sur, Tsuyoshi Anthony Horibata it 1st District it Camarines Sur, Miguel Luis Villafuerte it 5th District it Camarines Sur, ag Nicolas Enciso lll it Bicol Saro Party-list.
Nasayuran nga nagpangayo it pasaylo si cong. haresco sa nasambit nga mga naeakot nga kaibahan nga kongresista sa 19th congress .
