KALIBO, Aklan—Bukon it pabor si Aklan board member Atty. Harry Sucgang sa uman nga pagbuhi ni Pangueong Rodrigo Duterte sa penalidad nga kamatayon pinaagi it lethal injection sa mga nakakomiter it henious crime.
Suno kana, kato pa man hay dispabor eon imaw sa nasambit nga proposisyon bangud nga raya hay makabig nga “anti-poor”.
Ginpaathag nga uwa it mahimo sa nasambit nga penalidad ro mga kubos nga tawo nga masentensyahan it kamatayon.
Mas makapamayad pa suno kana ro sensya nga mintras buhi nga pagkakulong kaysa sa death penalty.
Kon ro pobre sigon ro masentensyahan kara hay uwa eon it pamaagi para makasukoe pa sa korte rason nga hugot imaw nga nagapamaeabag sa uman nga pagbuhi it death penalty.
Madumduman nga sambilog ro isyung death penalty para sa mga drug convicts ro ginpunto it presidente sa anang ikalimang State of the Nation Address (SONA).
Nagpabutyag imaw sa mga representative it daywang kapueungan it Kongreso para ipasa ro laye it sentensyang bitay.
Kon madumduman, dag-on 2006 kat suspendihon it gobyerno ro death penalty, nga dati hay penalidad sa mga may saea nga drug trafficking ag iba pang seryosong krimen.
Bukon it raya ro unang beses nga ginduso it presidente ro pagbalik it death penalty, bangud sa anang ulihing SONA hay kaibahan raya sa priority bills nga anang ginsambit.
