KALIBO, Aklan—Ginakabig ro Aklan bilang “low-risk” area sa sueod eon it daywang domingo sa bilog nga Western Visayas, base sa growth rate ag average daily attack rate nga nailista it Department of Health Western Visayas Center for Health Development.
Sa pihak it pagtaas it mga kaso it COVID-19 sa Aklan, naeakip gihapon raya sa mga low risk areas umpisa Mayo 17 hasta 30.
Angot kara, hugut nga ginapadumdum it PHO-Aklan ro mga akeanon nga indi maging kumpiyansa ag padayun ro pagsunod sa minimum protocol and health standards kapareho it pagsuksok it face masks ag face shields, paghugas it alima gamit ro tubi ag sabon ukon paggamit it alcohol, paglikaw sa mga matawong lugar ag pagsunod sa physical distancing kamana man ro pagpabakuna kontra sa COVID-19.
Base sa report, nagmayad man ro average daily attack rate it aklan halin sa 4.64 percent sa 3.06 percent.
Mag-eowas kara, nagnaba man ro kaso it deadly virus sa probinsiya it kapin sa 34% halin sa 397 ko Mayo 3 hasta Mayo 16 sa 262 ko Mayo 17 hasta Mayo 30.// nakalista man ro probinsiya it 34.21 percent beds utilization rate.
Buot hambaeon nga 27 porsiyento ukon 13 nga Covid ward beds eamang ro nagamit samtang 43.48 percent ukon napueo nga intensive care units beds ag 37.21 percent ukon 16 nga isolation beds ro na-okupahan.
Naga-abot man sa 23 percent ro utilization rate ukon hagamit nga mga isolation ag quarantine facilities.
Kaeakip sa mga banwa nga naeakip sa top 10 nga may mataas nga kaso it coronavirus hay ro Kalibo, Banga, Balete, Malay, Altavas, Makato, Nabas, New Washington ag Numancia.
Samtang, ro mga banwa it Balete, Altavas ag Banga ro gina-classify makaron bilang high risk areas.
Hasta Mayo 31, ro Aklan hay nakalista it kabilugan nga kaso nga 2,343 kaibahan ro 21 nga bag-ong kaso samtang ro nagmayad eon halin sa sakit hay 2,003 nga may 44 nga bag-ong recoveries.
Ro aktibong kaso hay 288 ag ro namatay hay nagsaka sa 52 matapos ro nailistang sambilog nga bag-ong namatay.
