KALIBO, Aklan—Matapos ro masobra sa sang buean nga pagbutang sa probinsiya it Aklan sa idaeum it enhanced community quarantine (ECQ), gin-downgrade eon ro anang status sa general community quarantine (GCQ) epektibo makaron nga adlaw, Mayo 1.
Kadungan sa pagbawi sa ECQ, nagpaguwa si Governor Florencio Miraflores it executive order no. 023 sa pagtaeana it mga bag-ong guidelines para sa pagbukas it pilang mga negosyo kapareho it essential business establishments, mga opisina, mga aktibidadis ag iba pang patakaran.
Sa ginpatigayon nga press teleconference, ginpahayag it gobernador nga ro nasambit nga tikang hay bilang pagsunod sa mandu it Inter-Agency Task Force for the Management of Emerging Infectious Diseases (IATF-EID) nga naga-classify eon sa aklan sa moderate-risk area ag pwede eon nga maga-adopt it GCQ.
Sa pihak kara, ginpadumdum ni Miraflores nga magapabilin ro precautionary measures sa idaeum it bag-ong quarantine level, maskin nga ginapasugtan eon ro publiko nga magguwa agud nga magpamakae it andang mga kinahangeanon.
Ro mga indi pagapasugtan hay ro ginakabig nga high-risk population nga naga-edad it 20 anyos panaba ag 60 anyos pataas.
Obligado man suno kana ro tanan nga magsuksok it face masks sa guwa it panimaeay ag hugut man nga igapatuman ro social distancing base sa national guidelines ag health advisories.
Samtang, ro mass gatherings partikukar ro selebrasyon it kapiestahan ag religious activities hay bawae sa gihapon.
Para sa kaeowasan it mga aklanon, ro mga driver ag pahinante it mga trucks ag delivery vans nga nagadaea it mga goods sa probinsiya hay bawae nga magpanaog sa andang saeakyan agud nga malikawan ro direct contact.
May regulasyon man sa pagsueod ag pagguwa it mga medical practitioners sa aklan.
Sa pihak nga parte, obligado eon ro mga pampasaherong saeakyan nga makaangkon it manifesto it andang mga pasahero para sa mas madali nga contact tracing engkaso nga may infected it coronavirus sa probinsiya.
Pagasugtan ro operasyon it mga establisimento ag merkado publiko umpisa alas-8:00 it agahon hasta alas-5:00 it hapon mag-eowas sa mga banko nga may banking hours nga 9:00am to 3:00pm.
Magapabilin man ro curfew nga 8:00pm hasta 5:00am mag-eowas sa pilang mga workers nga required nga pirmeng magdaea it andang mga company ID ag iba pang dokumento.
Obligado sa gihapon ro pagbitbit it quarantine pass , kun sa siin , raya hay pwedeng ipahueam sa iba pang miyembro it pamilya.
Magapabilin man ro liquor ban.
