KALIBO, Aklan—Ginpapanaog eon sa alert level 2 it National Inter-Agency Task Force for the Management of Emerging Infectious Diseases (IATF-MEID) ro probinsiya it Aklan umpisa makaron nga adlaw, Nobyembre 1 hasta 14 bangud sa padayun nga pagnaba it kaso it COVID-19.
Sa makaron hay ginbutang eon sa low risk ro health care utilization ag nagnaba eon ro numero it mga bag-ong kaso ko nagtaliwan nga mga domingo.
Sa makaron hay naga abot eon lang sa 29 ro aktibong kaso ag sambilog nga pasyente halin sa banwa it ibajay ro naka-admit sa Covid-19 referral hospital hasta ko Oktubre 29.
May kabilugan nga 12,629 nga confirmed cases ro probinsiya ag 320 ro patay umpisa nga magtuhaw ro pandemya.
Sa idaeum it Alert Level 2, ginapasugtan eon ro pagguwa it mga indibidwal mag-eowas sa mga may comorbidities ag pagpatuman it age restrictions nga magadepende sa desisyon it lokal nga gobyerno.
Pwede man nga pataasan sa 50 percent capacity ro mga establisyimento ag dugang nga 10 percent sa mga nataw-an it safety seal.
Sarang man nga ipasaka sa 70 percent ro kapasidad sa mga outdoor dining.
