KALIBO, Aklan—Ginpasidunggan it Department of Interior and Local Government (DILG) Western Visayas ro probinsya it Aklan bilang Best Performing Province.
Raya hay kasunod it Pagdayaw 2019 nga ginpatigayon ko Disyembre 3 sa Diversion 21 Hotel Iloilo.
Suno kay Aklan Governor Florencio Miraflores, ro nabatun nga award it probinsya hay ginbase sa local legislation, economic development, social services, administrative ag environmental management.
Nagpangibabaw ro Aklan sa daywa pang mga finalist nga probinsya it Guimaras ag Capiz.
Ro nasambit nga probinsya hay nangin champion sa social governance ag local legislation, 1st runner-up sa administrative governance ag 2nd runner-up sa environmental governance ag economic governance.
Madumduman nga ko dag-on 2017, ginpasidunggan man ro Aklan bilang Best Performing Province.
Presente man nga nagdaog ro probinsya it Aklan bilang Best in eGOV Digital Finance Empowerment (GP2) category ko nagtaliwan nga Digital Governance Awards 2019 nga ginpatigayon sa Philippine International Convention Center (PICC) sa Pasay City ko Nobyembre 26 nga ginbase man sa Enhanced Tax Revenue Assessment and Collection System (ETRACS) ag Access Gate System sa Caticlan ag Cagban Passenger Terminals kamana man sa Jetty Port.
Ginbatun man it probinsya ro Seal of Good Local Governance (SILG) awards for 2019 maghalin sa DILG ko nagtaliwan nga Oktobre sa pang limang kahigayunan.
Ginpabutyag dugang nga ro nabatun nga pasidungog sa social services hay bangud sa gintukod nga Aklan Youth Center sa probinsya para sa mga Children in Conflict with the Law (CILC).
Nasayuran nga dating naka-eakot sa presuhan ro mga menor de edad nga nag-eabag sa layi apang sa makarun hay may kaugalingon eun sanda nga lugar kung siin pwedeng magbag-o ro andang pamatasan.
