KALIBO, Aklan—Ginmandu ni Aklan Governor Florencio Miraflores ro pagkansela sa tanan nga mga public events ag mabahuean nga mga pagtililipon bilang pagpangaman sa nagatinaas nga kaso it coronavirus disease sa nasyon.
Raya ro ginpahayag ni Provincial Health Officer Dr. Cornelio Cuatchon.
Tuyo sigon it ginpaguwa nga Executive Order No. 18 ni Gov. Miraflores sa ginpatigayon nga pueong ko nagtaliwan nga Marso 12, 2020 nga maprotektahan ro mga residente it probinsiya.
Ginkumpirma pa ni Dr. Cuatchon nga owa pa it kumpirmadong kaso sa Aklan.
Sa nasambit nga mandu, nakabaehag kara nga gina-obliga ro mga daeagkuan nga transportation companies nga tan-awon ro body temperature it andang mga pasahero sa mga terminals gamit ro handheld thermal scanners, kamana man sa mga malls ag iba pang mga establisimento komersiyal nga magbutang it hand sanitizers para sa andang mga customers.
Kanselado eon man sigon ro mga naka-linya nga aktibidades para sa selebrasyon it ika-64 nga anibersaryo it Aklan Day.
Ro mandu hay magabuhay sa sueod it 45 diyas bilang sabat sa rekomendasyon it Inter-agency Task Force for the Management of Emerging Infectious Diseases.
Kamana man sa proklamasyon ni Pangueong Rodrigo Duterte nga ipaidaeum sa public health emergency ro Pilipinas ag ro pagpataas sa code red sub level 1 it Department of Health.
Gindugang pa ni Dr. Cuatchon nga ginalaygayan man ro mga naga-uli nga mga aklanon nga halin sa mga nasyon nga apektado it COVID-19 nga magpatigayon it home care quarantine sa sueod it 14 diyas, kun sa siin, hugut sanda nga pagabantayan it health response teams it mga kabarangayan.
Sa oras nga matapos ro quarantine hay paga-isyuhan sanda it medical clearance it municipal health officer.
Sa makaron suno kana hay may sambilog nga persons under investigations sa Aklan ag pang-10 sa kabilugan.
Imaw hay sangka seaman nga naghalin sa nasyon nga infected it sakit nga naga-angkon it mild nga sintomas.
Ro specimen samples sigon kara hay igapadaea sa Research Institute for Tropical Medicine ukon RITM.
Base sa datus it Provincial Health Office, nakalista sanda it 50 as of March 12.
Owa man sigon it testing kits sa mga regional levels bangud nga available eamang raya sa RITM bilang national reference laboratory.
