KALIBO, Aklan—Hugut nga ginapabantayan makaron ni Aklan Governor Florencio Miraflores ro isla it Boracay matapos ro pagtaas it daily attack rate it covid 19 sa probinsiya it Aklan.
Suno kay Buruanga mayor Concepcion Labindao nga raya ro sambilog sa mga natalakay sa ginpatigayon nga emergency meeting it Provincial Inter-Agency Task Force ko nagtaliwan nga adlaw.
Nagakabaeaka sigon ro gobernador bangud sa amat-amat eon kunta nga pagbangon it industriya it turismo sa isla.
Gusto sigon kara nga masiguro nga magiging zero covid case ro isla.
Samtang, haeos punuan eon man suno kana ro mga quarantine facility rason nga naghinyu si governor Miraflores sa mga municipal mayors nga dugangan pa ro andang mga pasilidad bangud sa ginaeauman nga pagsirit pa it mga kaso.
Ginadugang pa ni mayor Labindao nga ginapatun-an eon ni Miraflores ro posibleng rason it gulping pagtaas it mga may covid sa probinsiya.
