KALIBO, Aklan — Nagpamalibad anay nga magtao it anumang pahayag si Aklan Governor Florencio Miraflores may kaangtanan sa gina pangatubang nga kaso sa Sandiganbayan Second Division bangud sa maanomaliyang deklarasyon sa anang Statement of Assets, Liabilities and Net Worth (SALN).
Si Miraflores kaibahan ro anang misis nga si dating Ibajay Mayor Ma. Lourdes Miraflores hay gin pasakaan it kasong pag eabag sa Section 8 it Republic Act 6713 ukon Code of Conduct and Ethical Standards for Public Officials and Employees base sa charge sheets nga gin pasaka ni Graft Investigation and Prosecution Officer III Rachel T. Cariaga-Favila.
Gina sugid nga napaseawan ro mag-asawang Miraflores nga ideklara sa andang 2006, 2007, 2008 ag 2010 SALN ro pilang propriedad kaeakip eon ro andang masobra sa P6-million nga investments sa Rural Bank of Ibajay, Inc., sangka Elf, sangka pick-up, sangka Nissan Safari wagon, ag sangka motorsiklo.
Kabilogan nga P120,000 ro gin taeanang pyansa sa anda ukon P30,000 per breach of conduct charge.
Nauna kara, gin pasakaan it Ombudsman it kasong administratibo sa parehong dahilan ro mag-asawa apang, nakasekyar it Temporary Restraining Order sa Court of Appeals ag ku ulihi hay nataw-an it permanent injunction.
