KALIBO, Aklan—Ginaeauman nga magapaguwa eon man it bag-ong Executive Order si Aklan Governor Florencio Miraflores matapos nga i-rekomendar it National Inter-Agency Task Force ukon IATF nga ibutang ro Aklan sa GCQ classification halin sa MGCQ.
Suno kay Dr. Cornelio Cuatchon it Provincial Health Office ukon PHO-Aklan nga kinahangean nga magkooperar ag intindihon anay it publiko ro anuman nga igapatuman nga mas hugut pang restrictions bangud nga ro nagapangunang tuyo kara hay matapna ro pagtinaas it kaso it Covid-19.
Kon dati hay 18 anyos panaba ro owa ginapasugtan nga makaguwa kaibahan ro mga senior citizens nga 65 anyos pataas hay posibleng umpisa 21 anyos panaba hay pagabawaean man makaron.
Ginaeauman nga igapatuman ro bag-ong restrictions sa Hulyo 1 hasta 15, 2021.
Kaibahan sa mga bawae makaron sa idaeum it MGCQ with heightened restrictions hay ro social gatherings, limitadong capacity it religious activities sa 30 percent, ag sarado anay ro mga dine-in nga serbisyo it mga restaurants ag iba pang kaean-an , barberya, mga salons ag gyms.
Hugut man nga ginapatuman ro border control checkpoints sa mga banwa ag barangay kamana man nga ro mga ginpasugtan eamang sa lamay it patay hay ro mga miyembro it pamilya.
