KALIBO, Aklan—Ginpasaeamatan ni Aklan Governor Florencio Miraflores ro kooperasyon ag bulig it mga Akeanon matapos nga makabaton it pagdayaw halin sa Department of Health bangud sa mga tikang nga ginhimo sa pagtapna sa Coronavirus Disease ukon COVID-19.
Suno kay Governor Miraflores nga mabahoe ro naibulig it Municipal Leadership and Governance Program it DOH ag Zuellig Family Foundation agud nga mas pang mapabaskog ro health delivery system it probinsiya rason nga naging preparado sanda ag nasayuran eon ro mga dapat nga obrahon sa pagtama it Coronavirus Disease ukon COVID-19.
Unang ginpabaskog sigon it kada banwa hay ro andang mga barangay health emergency response team ukon BHERTs nga hugut nga nagbantay sa andang natungdan nga komunidad agud nga malikawan ro local transmission it sakit.
Owa pa man suno kana nakasueod sa aklan ro covid-19 infection hay nagpatuman eon imaw it enhanced community quarantine sa bilog nga probinsiya sa tuyo nga maprotektahan ro mga pumueuyu.
Angot kara , uman imaw nga nag-apela nga hugut sa gihapon nga ipatuman ro mandatory nga pagsuksok it face mask ag i-practice ro nagakaigo nga physical distancing.
