KALIBO, Aklan–Nagpagguwa it bag-ong sueondanan sa idaeom it Alert Level 2 si Aklan Governor Florencio Miraflores kahapon, Enero 5.
Raya hay sa tunga it padayun nga pagtinaas it mga bag-ong kaso it COVID-19 daea it Omicron variant.
Nakabaehag sa Executive Order No. 001 Series of 2022 ro mas ginpaeawig nga curfew hour sa bilog nga probinsya it Aklan umpisa alas-9:00 it gabi-i hasta alas-4:00 it aga-aga samtang alas-10:00 it gabi-i hasta alas-5:00 it aga-aga sa isla it Boracay.
Kaibahan sa nakaangkon it pilang ka mga adjustment hay ro operasyon it mga business establishment sa probinsya umpisa alas-5:00 it aga-aga hasta alas-8:00 it gabi-i samtang alas-5:00 it aga-aga hasta alas-9:00 it gabi-i sa Boracay.
Ro mga establisyemento hay pagapasugtan nga mag-operate it 30 percent indoor capacity sa mga fully vaccinated individuals ag 50 percent sa mga outdoor venue capacity basta nga ro mga empleyado hay fully vaccinated.
Nagapabilin man sa ap-at nga pasahero ro pwedeng maisakay sa mga nagabiyaheng tricycle ag 70 porsyento sa iba pang Public Utility Jeepney (PUJ), motorbanca ag iba pang saeakyang pandagat.
Maga-umpisa ro operasyon it pampublikong transportasyon it alas-5:00 it aga-aga hasta alas-8:00 it gabi-i.
