KALIBO, Aklan—Pagataw-an it nagakaigo nga atensyon ag suporta ni governor Joen Miraflores ro industriya it turismo sa probinsiya it Aklan.
Suno kay Roselle Ruiz, Provincial Tourism Officer nga gusto it gobernador nga pabaskugon ro nagkaeain-eain nga tourist attractions sa mainland Aklan bangud nga masyado eon sigon nga kilaea ro isla it Boracay.
Kinahangean suno kana nga mapabaskog ro nasambit nga industriya bangud nga sambilog raya sa pinaka-grabeng nadaeasa sa pagtama it pandemya daea it covid 19 nga nagresulta sa pagkaduea it trabaho it maabu nga mga pumueuyu nga nagasalig sa nasambit nga sektor.
Ginmandu sigon it gobernador nga mag-obra sanda it promotional materials ag magpartisipar sa Philippine travel marts agud nga mas pang mapaeapad ag maging epektibo ro pagpakilaea sa mga programa it turismo it probinsiya.
Sa raya nga pamaagi sigon hay mas masiguro nga maipakilaea ro tanan nga atraksyon sa Aklan partikular ro kultura, festivals, cuisine ag iba pa.
Sa pihak nga parte, sa uman nga pagbalik it mga turistang koreano, nagaplano sigon ro andang taeatapan sa paghimo it mga tour packages agud nga samtang nagahueat it andang flight ro nasambit nga mga turista pabalik sa andang nasyon hay mataw-an sanda it kahigayunan nga malibot ro iba pang tourist spot sa mainland Aklan.
Gindugang pa ni Ruiz nga kaibahan sa andang plano ro pagpabaskog sa natural attractions kapareho it beaches kamana man ro agri-tourism farms ag kulinarya.
Gin-engganyo man nana ro tanan nga magbulig agud nga mapa-umwad ro turismo sa mainland Aklan nga sambilog sigon sa pinaka epektibong instrumento sa pag-umwad it ekonomiya.
