Kalibo Aklan ———Uman nga nag-apela si Aklan Governor Florencio Miraflores sa mga Aklanon mga magkooperar sa ginapatuman nga health and safety protocol agud nga malikawan ro pagtaeapnan it makamaeatay nga virus nga COVID-19.
Suno kay Miraflores nga bukon eun it hinangae ro nagakatabo makarun sa probinsya matapos nga makalista it 30 percent nga positivity rate ko nagtaliwan nga pitong adlaw.
Boot hambaeon sigon kara nga sa pueong ka mga indibidwal nga ginapaidaeum sa swab test hay tatlo sa mga raya ro nagapositibo sa nasambitan nga sakit.
Mas mataas man sigon raya kung igakumpara sa Metro Manila nga may una eamang nga 5 percent nga positivity rate.
Kasunod kara, nagpanawagan man raya sa mga pomoeuyo nga limitahan anay ro pagguwa sa andang panimaeay kung owa it importante nga pamanaw.
Dugang pa kara nga sa makarun hay punuan eun ro mga quarantine facility ag nagaproblema eun ro mga kabanwahanan bangud owa sanda it mabutangan it andang mild ag asymptomatic nga COVID-19 patients.
Samtang ginklaro man ni Aklan Governor Miraflores nga extended pa ro ginapatuman nga Modified General Community Quarantine (MGCQ) with heightened restriction sa probinsya it Aklan umpisa Hunyo 22 hasta Hulyo 6, 2021.
Raya hay sandig sigon sa anang ginpaguwa nga Executive Order No. 005-D, series of 2021 kung sa siin mas pang gindugangan ro mga restrictions agud nga makontrol pa ro pagtinaas it mga kaso it COVID-19.
Dugang pa kara nga sa makarun hay uman euman nga ginabawaean ro pagdine-in sa mga restaurant ag iba pang food establishments sa Aklan.
Mag-euwas sa dine-in, bawae man ro mga outdoor ag indoor sports ukon venues para sa mga contact sports, fitness studious, gym, spa, beauty salon, beauty parlors, medical aesthetic clinics, cosmetic ukon derma clinics, libraries, museums, galleries ag mga cultural shows ag exhibits.
Nagapabilin man nga bawae ro pagbukas it mga karaoke bars, bars, club, concert halls, theater, cinemas ag mga recreational venues kapareho it mga internet cafes, billiard halls, amusement arcades, bowling alleys ag iba pa.
Samtang, ro mga hotels ukon accommodation establishments nga may valid DOT accreditation eamang ro pweding magbatun it mga guest.
Bawae man nga magguwa ro naga edad 18 panaba ag 65 pataas kamana man ro mga may ginaangkon nga immunodeficiency, comorbidity individuals maging ro mga nabdos.
Samtang, ginpasugtan man nga magguwa ro mga essential goods, essential services ag may health ukon medical reasons.
