Kalibo Aklan ————–Igapanaba eun ro quarantine classification it probinsiya it Aklan maghalin sa Modified Enhanced Community Quarantine (MECQ) paadto sa General Community Quarantine (GCQ).
Suno kay Dr. Cornelio “bong” Cuatchon Jr. it Provincial Health Office ( PHO-Aklan) nga magiging epektibo ro nasambitan nga pagsinueondan umpisa sa Setyembre 8 hasta 30.
Raya hay base sigon sa ginpagguwa nga inisiyal nga impormasyon it Department of Interior and Local Government (DILG).
Samtang nakataeana man nga magpagguwa hin-aga nga adlaw it martes it Executive Order si Aklan Governer Florencio Miraflores para sa panibag-o nga guidelines.
Samtang, ginpahayag man ni Dr. Cuatchon nga sa makarun hay una eun sa “low risk” ro probinsiya pag-abot sa mga nailistang kaso it coronavirus disease (COVID-19).
Sa idaeum it GCQ hay iga-lift eun ro barangay checkpoint, samtang pagapataasan man sa 15 hasta 50 nga mga non-essential travelers ro pagapasugtan nga makasueod sa banwa it Kalibo maghalin sa nagkaeain eain nga banwa.
Pagapasugtan man ro dine-in sa mga restautant ag puwedi eun man nga magbukas ro mga salon ag barber shop apang hasta eamang sa 30 porsiyento it andang kapasidad.
Ginpahabaan man it hasta alas 7:00 it gabi-e ro operasyon it mga business establishments samtang ro public transport hay hasta it alas 8:00 it gabi-e.
Samtang, good news ! bangud iga-lift man ro liquor ban apang pagapasugtan eamang ro pag-inom sa sueod it panimaeay.
Magapabilin man ro ginapatuman nga curfew hour umpisa alas-8 it gabi-e hasta alas-4 it agahon.
