KALIBO, Aklan—Nag-apela makaron sa publiko ro Aklan Medical Society nga likawan ro pagdiscriminate sa mga frontliners nga sanda ro may mabahoe nga papel makaron sa pakikipagsukoe sa coronavirus disease ukon Covid-19 pandemic.
Sandig sa ginpaguwa kara nga official statement, ginpabutyag nga bukon it manami makaron nga nakikipagsukoe kita sa crisis pandemic nga nakakaeksperyensya it bukon it makata-o nga diskriminasyon ro mga frontliners.
Gin-insister man kara nga may naga-iral nga laye kaangot sa diskriminasyon sandig sa Aklan Anti-Covid 19 Discrimination Ordinance ginpasa ko Abril 27,2020.
Ro maga-eabag sa nasambit nga ordinansa hay posibleng magapangatubang sa penalidad partikular nga magamulta raya it kapin sa P5,000 pesos ukon pagkakulong it hasta sa an-om nga buean.
Gin-engganyo man kara ro publiko nga maging responsable sa paggamit it social media agud nga inde makasakit it ibang tawo.
Ginpabutyag dugang nga raya ro tyempo para magbueoligan ro tanan para daeayong matapna ro deadly virus.
Nasayuran nga kapin sa 29 ka mga healthcare workers sa Aklan ro infected it nasambit nga virus samtang nakalista man it kabilugang 75 ka mga kumpirmadong kaso bilog nga probinsya.
Sa nasambit nga numero, 35 pa ro mga active cases samtang ap-at man ro namatay bangud sa sakit.
