KALIBO, AKLAN — Naga pabiling insurgency free ro probinsiya it Aklan.
Raya ro gin kumpirma ni Lt. Col. Leomar Jose Doctolero, commander it 12th Infantry Batallion it Philippine Army.
Suno kay Doctolero nga hasta sa makaron hay owa pa sanda it nababaton nga report hanungod sa pagsueod it mga rebeldeng armadong grupo sa probinsiya.
Bangud sa insidente it pagpangsunog it daywang heavy equipment it BSP and Company, Inc. nga gina patihang kahimuan it rebeldeng grupo, ginabantayan sigon it andang mga suldado ro gina construct nga Banga-Libacao road.
Samtang, gin pahayag pa ni Doctolero nga nakikipag-angot eon sanda sa Philippine National Police, Philippine Navy ag iba pang natungdan nga ahensiya it gobyerno agud mas pang hugtan ro seguridad sa isla it Boracay.
Nag pangayu man raya it bulig sa publiko nga maging mapagbantay kasunod it mga insidente it pag-atake it teroristang grupo sa Bohol ag Marawi kamana man ro nagakatabu sa Resorts World Manila.
