KALIBO, Aklan—Nagaeaum ro lokal nga gobyerno it aklan nga pagataw-an it prayoridad it National Inter-Agency Task Force ro andang request nga 40,000 doses it covid 19 vaccines para sa mga tourism workers sa isla it Boracay.
Suno kay Aklan Governor Florencio Miraflores nga tuyo kara nga mas pang mapabaskog ro economic sector partikular ro sector it turismo.
Raya hay bilang preparasyon man suno kana sa pagbukas it Boracay sa International tourists.
May mabahoe suno kana nga kontribusyon ro sector it turismo sa gross domestic product, (GDP) nga naga-abot makaron sa 56 billion pesos.
Pagkatapos suno kana nga mabakunahan ro mga prayoridad sa listahan hay igasunod kara ro iba pang sector ag ginaeauman nga pagataw-an it atensyon ro tourism workers sa isla.
Nauna eon nga nabaton it Aklan ro andang 2,420 vials it Sinovac vaccine nga alokasyon halin sa Department of Health Western Visayas Center for Health Development.
Bulto it bakuna hay igatau sa mga health workers it Dr. Rafael S. Tumbukon Memorial Hospital (DRSTMH) nga may 920 vials.
Sakop man kara ro mga health workers it iba pang pampubliko ag pribadong ospital sa Aklan.
Nagaeaum si Governor Miraflores ro pag-arangkada it vaccination rollout sa probinsiya hay makapabaskog it kumpiyansa it publiko sa Sinovac vaccine.
