KALIBO, Aklan–Nagapabilin nga Malaria free ro bilog nga probinsya it Aklan umpisa pa ko dag-on 1995 hasta sa presenteng dag-on.
Samtang sa Western Visayas hay ro Negros eamang ro nagapabilin nga may unang kaso it nasambitan nga masakit.
Sa pihak kara, ginpahayag ni Dr. Glenford Refre, sangka internist-pulmunologist nga indi sa gihapon dapat magpakampante ro publiko kontra sa nasambitan nga masakit.
Raya hay bangud sa bilog nga Pilipinas may una pang mga nailistang kaso it malaria patikular eun sa probinsya it Northern Mindanao, Karaga, Kalinga ag Apayao.
Ro malaria hay sangka klase it masakit nga ginadaea it mga namok, partikular eun ro babayeng Anopheles mosquito.
Apang ro nagadaea gid it sakit hay ro parasite.
Kung ro sangka tawo hay naangkit it namok , ro parasite nga una sa eawas it namok hay puwedi nga maipasa kana.
Raya man ro nagadaea it nagkaeain eain nga mga sintomas kapareho it pagkaangkon it mataas nga eagnat, kunyag, pagpanakit it mga kasu-kasuan, pagpanakit it tiyan, ag maabo pang iba.
Agud nga malikawan ro sakit nga malaria dapat nga likawan ro pagbakasyon sa mga kilaeang malaria areas.
Magsuksok it mahabang eambong, magbanyos it mosquito repellent ag limpyuhan ro gina-istaran it mga namok.
