KALIBO, Aklan—Nagapabilin nga African Swine Fever (ASF) free ro probinsya it Aklan.
Bilang resulta, mas pang ginhugtan it Office of the Provincial Veterinary ukon OPVET- Aklan ro pagbantay hasta sa barangay leval agud nga maprotektahan ro backyard hog industry halin sa nasambit nga makamaeatay nga sakit nga naga-apekto sa mga alagang baboy.
Raya hay pinaagi sa pagtukod it barangay biosafety officer nga nagatuyo nga mabo-oe ro bulig it mga pumueuyu, opisyal it barangay ag mga volunteers agud nga madaling matumod kon nakasueod ro ASF sa sangka lugar.
Suno kay Dr. Joseph Lachica it OPVET-Aklan nga nakapaidaeum eon sa sample collection training ro mga gintaeana nga barangay biosecurity officers nga magiging kabulig nanda.
Ro mga BBO hay iga-identify it andang mga natungdan nga local government units.
Mas madasig eon man sigon makaron nga matumod kon apektado it ASF ro mga natipon nga samples ag iba pang produkto kapareho it meat products pinaagi sa ginbakae nga PCR machine it department of agriculture region 6 kun sa siin ro mga samples hay indi eon kinahangean nga daehon sa Bureau of Animal Industry sa Manila.
Angot kara, ginpahayag ni Dr. Lachica nga nagbaeay eon ro provincial government it ordinansa para sa pagtukod it task force ag Bantay ASF sa Barangay.
Sa pihak nga parte, padayun suno kana ro andang border control sa tanan nga mga pantalan ag paeuparan sa probinsiya kontra sa ASF.
Sa kamatuoran suno kana hay kapin sa 120 kilos it illegal nga karne ag mga frozen meat products ro ginbaeabagan sa caticlan jetty port ko nagtaliwan nga domingo.
Ro nasambit nga mga karne ag meat products nga pagadaehon kunta sa Iloilo city hay ginpabalik sa anang point of origin.
