KALIBO, Aklan—Nagapabilin nga red tide free ro probinsiya it Aklan.
Raya ro ginkumpirma ni May Guanco, Provincial Director it Bureau of Fisheries Aquatic Resources (BFAR)-Aklan base sa andang pinaka-ulihing shellfish bulletin.
Kada buean suno kana hay nagapatigayon it water monitoring ag meat sample ro team halin sa central office kaibahan ro mga taga-laboratory sa regional office ag gina-analyze raya sa andang opisina.
Regular sigon ro ginapatigayon nga inspection it BFAR central office sa mga shellfish nga nakolekta sa mga baybayon nga sakop it Balete, Batan, Altavas ag tinagong dagat sa banwa it New Washington.
Ulihi sigon nga naexperiensiyahan ro red tide sa Aklan ko 2015 hasta 2016.
Nasayuran nga apektado makaron it red tide ro maabung baybayon sa nasyon.
Pinakabag-ong naapektuhan ro Lianga Bay sa Surigao del Sur sa parte it Mindanao.
