KALIBO, Aklan — Nagapabilin ro probinsiya it Aklan sa idaeum it green category it Commission on Elections (Comelec).
Raya ro ginklaru ni Provincial Election Supervisor Atty. Roberto Salazar it Comelec Aklan.
Suno kana nga rekomendasyon pa eamang ni Comelec Chairman George Erwin Garcia nga ipasaka ro klasipikasyon it probinsiya sa yellow category bangud sa natabu nga pagbaril patay sa 89 anyos nga mamamahayag nga si Johnny Dayang.
Raya hay bangud nga ginakabig it komisyon nga may kaangtanan sa eleksyon ro insidente.
Ro “yellow” category suno kana hay nagakahueugan nga ro sangka lugar hay may history ukon may nagakatabu nga kinagamo angot sa eleksyon.
Sa pihak kara, padayun pa sigon nga ginatun-an it Regional Joint Security Control Center ro posibilidad nga ipasaka ro kategorya it Aklan sa yellow halin sa green.
Sa mabuhay nga tiempo ro Aklan hay nabutang sa green category nga buot hambaeon nga ro lugar hay matawhay sa pangkabilugan base sa assessment it Philippine National Police .
