KALIBO, Aklan—Nagapahaum eon ro 17 nga ka banwa sa probinsiya it Aklan para sa pagtama it bagyong Auring.
Suno kay League of Municipalities of the Philippines ukon LMP-Aklan chapter president ag Ibajay mayor Joen Miraflores nga temprano nana nga ginpueong ro anang Municipal Disaster Risk Reduction and Management Office ukon MDRRMO bilang pagpahaum sa posibleng kahalitan nga igatuga it bagyo eabi pa ag ginapanan-aw nga ro mata kara hay maeapit sa probinsiya.
Activated sigon ro andang MDRRMO ag preparado ro andang pre-emptive evacuation engkaso nga magtaas ro tubi-baha ag magbunok ro uean para sa kaeowasan it mga residente.
Gindugang pa kara nga siguradong makarondaya man ro gina-obra it iba pang mga alkalde bangud nga nasayuran man nanda ro andang importanteng papel sa tiempo it trahedya.
Kabay suno kana nga magahina ro bagyo sa pag-agi kara sa probinsiya sa Lunes nga adlaw.
