KALIBO, Aklan—Nakalista it 27 nga panibag-ong kaso it tinamaan it dengue sa bilog nga probinsya it Aklan halin ko Marso 11 hasta it 15, 2025 rason nga umabot eon sa kabilugan nga 257 ro dengue cases halin pa ko buean it Enero 2025.
Bangud kara, gin-engganyo ni YJhyl Dela Cruz, health program officer II it Aklan Provincial Health Office ro tanan nga magbueoligan sa paglimpyo it palibot agud nga inde eon madugangan ro nasambit nga kaso.
Mabahoe nga bulig suno kana ro kooperasyon it komunidad agud nga matapna ro pag-eapnaag it namok nga nagadaea it sakit nga dengue.
Base sa datos it ahensya, ro limang nagapangunang munisipalidad nga nakalista it panibag-ong kaso it dengue hay ginakaeakipan it Poblacion, Balete; Pagsanghan, Banga; Laguinbanwa, San Isidro ag Tabaya sa Ibajay; Pook, Kalibo; Caticlan ag Manoc-Manoc sa isla it Boracay.
Panugyan ni Dela Cruz sa tanan nga sundon ro 5’s strategy nga ginakaeakipan it 𝐒earch and destroy mosquito breeding places kaparehas it mga kariton, ka-ang, balde ag drum; 𝐒ecure self-protection paagi sa pagsuksok it sae-wae, long sleeved nga mga eambong, ag magbutang it mosquito repellant; 𝐒eek early consultation kapin gid kung may sintomas it dengue kaparehas it mataas nga eagnat ag pagpaeanakit it eawas; 𝐒upport fogging and spraying only in hotspot areas; ag 𝐒ustain hydration kapin gid kon ginaeagnat bangud sa dengue.
