KALIBO, Aklan—Uman nga nakalista it mataas nga numero it mga nagmayad halin sa sakit nga Coronavirus Disease 2019 ukon COVID-19 ro probinsya it Aklan.
Base sa pinakaulihing datus it Aklan Provincial Epidemiology Surveillance Unit it Provincial Health Office, nakalista sanda it 137 nga bag-ong nagmayad rason nga humampak eon sa 3,361 ro total recoveries.
Sa pihak kara, 60 man ro nadugang sa bag-ong kumpirmadong kaso nga ginakaeakipan it 20 halin sa banwa it New Washington, 11 sa Kalibo, napueo sa Ibajay, pito sa Buruanga, lima sa Nabas, tig tatlong kaso sa Lezo ag Malay samtang sambilog sa Balete.
Bangud kara, sumaka eon sa kabilugan nga 4,283 ro tinamaan it COVID-19 infection sa probinsya umpisa nga magtuhaw ro pandemya.
Samtang, tatlo man ro nadugang sa numero it mga namatay rason nga nag-abot eon sa 100 ro COVID-19 related deaths.
Sa makaron, 822 pa ro nabilin nga aktibong kaso nga ginakaeakipan it 697 nga naka-Facility Quarantine, 55 nga naka-Home Quarantine ag 70 nga admitted sa COVID ward it Aklan Provincial Hospital.
