KALIBO, Aklan — Ginpaabot it Commission on Elections (Comelec)-Aklan nga nag-abot sa kabilugan nga 414,890 ro rehistradong botante sa probinsya para sa maabot nga national and local elections sa Mayo 12.
Ro kabilugan nga numero it mga rehistradong botante sa unang distrito hay 211,646 kun sa siin ro Kalibo ro may pinakamataas nga numero nga 53,724, samtang ro Madalag ro may pinakamanaba nga 13,610.
Ro unang distrito hay ginaeakipan it mga banwa it Altavas, Balete, Banga, Batan, Kalibo, Libacao, Madalag, ag New Washington.
Samtang, ro ikaywang distrito nga ginaeakipan it Buruanga, Malay, Ibajay, Tangalan, Makato, Lezo, Malinao, Numancia, ag Nabas hay may kabilugan nga 206,919 nga rehistradong botante.
Ro Malay ro may pinakamataas nga numero it botante nga nag-abot sa 40,878, samtang ro Lezo ro pinakamanaba nga may 10,305 nga botante.
Ro probinsya it Aklan hay may 603 clustered precincts sa 330 voting centers para sa maabot nga eleksyon.
Maga-umpisa ro pagboto sa Mayo 12 sa alas 7:00 it agahon hasta alas 7:00 it gabi-i.
Sa pihak kara, magabukas ro mga presinto umpisa alas 5:00 it agahon hasta alas 7:00 it agahon agud nga taw-an it pribilehiyo nga makaboto it temprano ro mga senior citizens, nabdos, ag mga may kapansanan.
Kadungan kara, gin engganyo it Comelec ro mga pumueuyu nga i-exercise ro andang kinamatarung nga makaboto bangud nga ro mataas nga voter turnout hay makasigurado nga ro nailihir nga mga opisyal hay naga-representar sa kagustuhan it publiko.
