KALIBO, Aklan—Nailista ro kauna-unahang kaso it Omicron variant sa probinsiya it Aklan.
Base sa opisyal nga pahayag it Provincial Health Office, nakita ro bag-o ag mas makataeapon nga variant sa sangka 42 anyos nga babaye nga residente it banwa it Batan.
Ko Enero 25, 2022 hay nabaton it Aklan Provincial Epidemiology and Surveillance Unit ro resulta halin sa Department of Health Region 6.
Ginasugid nga ro nasambit nga babaye hay nakitaan it mga sintomas it COVID-19, apang fully vaccinated.
Ginboe-an imaw it swab specimen ko nagtaliwan nga Disyembre 26 , 2021 ag ginpadaea sa molecular laboratory it Dr. Rafael S. Tumbukon Memorial Hospital.
Ro resulta hay dayun nga ginpadaea it DOH-6 sa Philippine Genome Center ko Enero 7 para sa whole genome sequencing.
Ro pasyente hay nagpaidaeum sa 14 diyas nga strict home quarantine ag makaron hay eubusan eon nga nagmayad.
Angot kara, ginlaygay ni Dr. Cornelio Cuatchon, Jr. it PHO Aklan nga agud nga maprotektahan sa anuman nga nagatuhaw nga variant it deadly virus hay mas mayad nga magpabakuna ag mag-avail it ginatanyag makaron nga mga booster shots kamana man nga hugut nga magsunod sa minimum public health standards.
