KALIBO, Aklan — Nagapameligro nga maka-eksperyensiya man it mabaskog nga linog ukon ro ginatawag nga ‘The Big One’ ro probinsiya it Aklan.
Raya ro ginpahayag ni Terrence June Toriano, head it Municipal Disaster Risk Reduction and Management Office (MDRRMO)-Kalibo base sa record it Philippine Institute of Volcanology and Seismology (PHIVOLCS).
Suno kana nga ro posibleng pagahalinan it mabaskog nga linog sa Aklan hay ro Tablas Fault, West Panay Fault ag ro Negros Trench.
Ro Tablas Fault suno kana hay naga-agi sa Tablas Romblon ag magatabok sa Isla it Boracay, ag mga banwa it Malay ag Buruanga.
Medyu delikado sigon ro nasambit nga fault system bangud nga owa raya haeos nga nagahueag it mabuhay eon nga tiempo.
Sambilog pang source hay ro West Panay Fault, kun sa siin ap-at nga banwa sa Aklan ro gina-agihan kara nga nagapameligro nga tamaan it mabaskog nga linog.
Raya hay ro mga banwa it Libacao, Madalag, Ibajay ag Malinao.
Apang ro good news hay pirme raya nga nagahueag butang nga nagahagan-hagan ro anang tensyon.
Apektado man sigon ro Aklan engkaso nga maghueag ro Negros Trench nga ginaboeobanta nga makasarang nga magtuga it sangka magnitude 7 nga linog ukon mas mabaskog pa nga pwedeng magtuga it mabahoe nga kahalitan eabi eon sa mga ginpatindog nga building sa Kalibo bangud sa epekto kara nga ‘ground shaking’ nga ginatawag.
Dugang pa nga bangud nga ro Negros Trench hay nahamtang sa dagat, pwede raya nga magtuga it tsunami nga posibleng maka abot sa mga baybayon it Buruanga, Malay ag Nabas.
Angot kara, ginalaygayan nana ro tanan nga maging haum sa anumang oras, maging seryoso sa pagpasakop sa mga earthquake drills ag awareness programs, siguraduhon nga matibay ro mga building ag baeay ag magsubaybay sa mga opisyal nga anunsyo halin sa office of civil defense ag PHIVOLCS.
