KALIBO, Aklan — Ginpaabot it Aklan Police Provincial Office (APPO) nga haum eon ro andang mga kapulisan para sa ikatlong State of the Nation Address (SONA) ni Pangueong Ferdinand “Bongbong” Marcos Jr. nga pagahiwaton sa Hulyo 22, adlaw it Lunes.
Suno kay Police Provincial Director, P/Col. Victorino Romanillos Jr. nga hugut nga seguridad ro andang ginapatuman para mapabilin ro kalinong ag kaayusan samtang ginapatigayon ro nasambit nga aktibidad.
Pagatutukan man sigon nanda ro anuman nga pagtililipon ukon pagpueong nga paga-obrahon it mga organisasyon.
Kaibahan kara ro nagabantay sa crowd control, daeagan it trapiko, ag deployment sa mga nagapangunang lugar.
Haum sigon ro mga kapulisan kaibahan ro andang mga kagamitan sa pag-atubang sa anuman nga sitwasyon nga magatuhaw.
Nakipag-angot eon man suno kana ro APPO sa iba pang law enforcement agency ag mga natungdan nga stakeholder agud nga masiguro ro maayos ag madinaeag-on nga event.
Ro training, briefings, ag pakikipagpueong hay ginpatigayon agud nga masiguro ro dere-deretso nga operasyon sa adlaw it SONA.
Ro APPO hay maga-deploy it sangka platoon it Civil Disturbance Management contingents sa adlaw it SONA. Via APPO
