KALIBO, Aklan—Magdahan sa nagakalhit nga pekeng kwarta.
Raya ro padumdum ni P/Staff Sgt. Jane Vega, tagapaghambae it Aklan Police Provincial Office ukon APPO sa publiko sa posibilidad nga may naka-eusot sa probinsiya it aklan nga narekober nga haeos tunga sa milyon nga balor it pekeng kwarta sa probinsiya it Capiz ko nagtaliwan nga buean.
Owa suno kana nagkueang ro mga awtoridad sa ginahimo nga information dissemination kontra sa modus it pilang indibidwal nga nagapakalhit it mga fake peso bill.
Agud nga masiguro nga indi mabiktima it pekeng kwarta eabi eon sa mga masako ag matawo nga lugar, gin engganyo ni vega ro publiko nga sanayon ro kaugalingon nga usisaon anay it mayad ro safety features it mga ginabaton nga kwartang papel kaibahan eon ro water mark ag serial number.
Ginpasiguro pa it APPO nga nagahueag ro kapulisan agud nga maaresto ro sin-o man nga indibidwal ukon grupo nga madakpan nga nagagamit ag eakot sa pagpakalhit it fake money.
Kadungan kara, apela man nana sa publiko nga isugid eagi sa pinakamaeapit nga police station engkaso nga mabiktima it pekeng kwarta agud nga insigidang maaksyunan ag madakpan ro sa likod it pagpakalhit kara.
Madumduman nga sangka fish vendor sa kalibo Public Market ro nabayaran it pekeng P1,000 peso bill ko agahon it miyerkules it owa nakilaea nga suspek nga babaye nga ginaboeobanta nga naga-edad it 60 anyos.
Ginpahayag it biktimang si Ramil Marte nga ulihi eon nanda nataeupangdan nga peke ro ginbayad kana nga kwarta kat mabasa ag magisi.
Sa makaron hay padayun nga ginatumod it mga awtoridad ro identity ukon pagkatawo it suspek.
